今早吃的是訂房時以特價每位伍佰日圓預訂的酒店早餐，款式不多，質素普通，如以正價每位壹仟日圓，實在不值，故此往後三天都沒有在這裏吃。
吃過早餐便向京都以北出發，從難波乘地下鐵御堂筋線在淀屋橋轉京阪本線到出町柳駅，再轉叡山電車到貴船口，全程一小時四十五分。
到達出町柳駅，人潮擠擁，大半是本地老人團，迫爆每一班電車。
這區是行山路線，鞍馬是終點站，我們選擇在貴船口下車，回程則在鞍馬駅上車，到時能找到座位的機會較大。
旅遊資料寫著由貴船口步行往貴船神社，需時約三十分鐘，沿途有商店街，心想一路上逛逛商店，三十分鐘很快便過去吧，於是捨棄無料送迎巴士而選擇徒步而行。豈料沿途非但沒有商店，遊人亦沒多少個，上斜的路程亦絕非三十分鐘便能完成，又一次被欺騙了！
終於來到貴船神社，這裏地方不大，但紅葉卻吸引不少「長短火」在圍攻！
神社有水占卜出售，白白的一張，沒有文字，但祗要放到水裏，韱文便會慢慢顯示，很有趣，我害怕如友人般抽著下韱，故祗看沒買。
這刻氣溫祗有八度。
遊罷貴船神社，又渴又餓，沿路沒有飲品販賣機，食肆不多亦不吸引，以為到鞍馬路上能找到吃，付過二佰日圓愛山費後，便向鞍馬山出發。由這裏開始便是上斜的崎嶇山路，因昨日下過雨，又濕又滑又直又窄，還要走一段凹凸不平的根の道，對我們來說絕對是個大考驗，當然，渴望一見的飲品販賣機和洗手間，一路都沒出現過，沿途祗靠迎面旅者的每一句こんばんは，來支撐著意志！
好不容易來到山頂，真有大地在我腳下的感覺，置身漫山紅葉中，幸福就是如此簡單，一切已不重要了！
這張照片是在疲倦得手騰腳震情況下拍攝的，畫面沒有「鬆郁蒙」，很難得耶！
四個半小時過去，終於到達山腳的由岐神社及鞍馬寺，又冷又餓，看到一部有熱飲販賣的飲品機，如獲至寶，這一口熱咖啡是人生中最甘甜的啊！
再轉個彎便到達鞍馬駅，又細又舊的一個車站，擠著不少歇息遊人，站外有一檔流動小吃店及一部流動麵包車，我們又吃了整個京都行程中最美味的食物。
出町柳是個典型民區，入夜後十分寧靜，沒地方可逛，還是早點回大阪去。
回到心齋橋已七時多，整天沒什麽吃進肚裏，決定到美國村伊万里屋吃燒肉放題，拿著劉鄧列印給我的九折優惠券，又節省了一筆，可滿足矣。
原來難波HIPS燈光會變色，在拍攝時才察覺得到。
南海電車站大樓頂部的球體也有幻變燈光，奪目耀眼！
一向有膝關節毛病的我，今天可累透了，雙膝痛得幾乎不會動，沐浴時靈機一觸，用按摩花灑對準膝蓋及小腿部位沖按十多分鐘，痛楚頓時舒援不少，隔早起來也不覺累了。
15 則留言:
我當日去鞍馬貴船人影都唔多個呀
有無料巴士梗係搭喇，執輸行頭吖嘛~
落返山那一段路啲風光最靚
行得咁辛苦都值嘅
你比邊度嘅旅遊資料呃左？
鞍馬貴船只會令我想起《陰陽師》裡面啲怨靈 ~~~
伊万里屋~~~有點懷念！
嘩~~原來鞍馬咁辛苦, 幸好上次無去到~~
鞍馬唔算辛苦呀
網主平時少做行家啫~
大頭：
我以為有街街行吖嘛，點知會靜到咁，好在風景靚靚補番數唧~
娜娜：
係一張宣傳單張，地圖明明有商店街架~
師姐：
我冇睇過陰陽師呀，但仍然好想夏天去貴船吃川床料理。
老師：
伊万里屋原來有"拾下拾下"放題架~
薯嘜：
貴船鞍馬好值得去架，係我地自已"豉椒拔"，冇帶乾糧同水啫，半路見到日本人吃自攜嘅飯團，真係流晒口水呀！
川床料理都仲可以，果啲「流水麵」就咪搞我嘞 ~~
嘩!師妹變身行家㖭~
班日本人的寫真器材好利害喎~
伊萬里屋有蝦食架咩?
我地一路都無留意添~
師姐：
第一次知道有貴船呢個地方，就係响網上見到川床料理囉~
劉鄧：
雖然行得辛苦，但又好開心啊！
d拍友巧勁架~
d蝦仲好好味添~^^
其實如果唔抗拒浸浴, 咁樣行左一日, 一定要浸下. 就算浸下對腳, 去到膝頭都要.
小彭：
嗰日攰到暈，見到張床都想瞓啦，仲邊會慢慢放滿個浴水吖，下次先啦~^^
所以要住有大浴場o個o的，湯治療效不可謂不神奇，直情起死回生！
我冇抽到下籤呀，係末吉呀~
娜娜：
下次我會醒d架喇~^^
大頭哥：
末吉即係乜呢？小小吉？
張貼留言